Ek bly in Orania – Orania is ‘n plek waar vir vele jongmense die kans gegun word om ‘n bestaan vir hulswelf te kan maak. Hier kan hulle klein begin en groot droom.

Orania bied aan hierdie jongmense ‘n veilige omgewing, waar daar met durf en selfwerksaamheid entrepreneurs gekweek word.

“Die lekkerste ding van Orania is vir my hoe veilig dit hier is… en dat ek met ‘n oop venster kan slaap,” So begin Eldien Kirsten te vertel van haar ervaring op Orania. Sy verduidelik verder dat om elke dag vryheid te mag beleef vir haar dié plek so besonders maak.

Eldien bly vir byna 20 jaar in Orania en is nog sielsgelukkig hier in die hartjie van die Noordkaap. Sy werk saam haar ma Uysie Kirsten by die Kontreiwinkel, wat nie te lank terug na ‘n splinternuwe perseel geskuif het nie. Eldien sien baie uit na dit wat die toekoms vir haar ma se besigheid, hier in Orania, mag inhou. Sy hoop ook om eendag te gaan studeer of verder te gaan met haar ballet.

Eldien is ‘n meisie wat baie skaam mag voorkom maar as mens haar eers leer ken en haar vertroue gewen het sal jy haar nie sommer stil kry nie. Dis soos om deur ‘n boek te blaai en op elke bladsy lê daar iets moois wat jy nie voorheen van haar raakgesien het nie. Sy het ook ander belangstellings soos, onder vele meer, musiek. Wanneer Eldien jou betower met haar musiekkeuses sal sy jou wegvoer na ‘n ander wêreld en jou uitnooi om lighartig saam te sing.

Orania het dié tipe mense nodig. Mense wat jou weer na die fyner dinge van die lewe laat kyk… sodat jy weer kan waardeer wat jy het.

Plasing gedeel vanaf Orania@oraniabeweging


Leave a Reply

This site uses Akismet to reduce spam. Learn how your comment data is processed.